JEKK JOGĦĠBOK ŻOMM F'MOĦĦOK: AĦNA AĠĠORNAJNA DAWN IT-TERMINI TAL-QLIGĦ TAL-FLUS TA' SNAP. TISTA' SSIB IL-VERŻJONI TA' QABEL MINN HAWN. DAWN IT-TERMINI TAL-QLIGĦ TAL-FLUS IL-ĠODDA SE JIDĦLU FIS-SEĦĦ FID-DATA MOGĦTIJA HAWN TAĦT.
Regoli tal-Qligħ tal-Flus ta' Snap
Fis-seħħ: 1 ta' Settembru 2025
AVVIŻ DWAR L-ARBITRAĠĠ: JEKK TGĦIX FL-ISTATI UNITI TAL-AMERKA JEW JEKK IL-POST EWLIENI TAN-NEGOZJU TIEGĦEK HUWA BBAŻAT FL-ISTATI UNITI TAL-AMERKA, INT MARBUT/A BID-DISPOŻIZZJONI TAL-ARBITRAĠĠ SKONT IT-TERMINI TAS-SERVIZZ TA' SNAP INC.: ĦLIEF GĦAL ĊERTA XORTA TA' TILWIM IMSEMMI FIL-KLAWŻOLA TAL-ARBITRAĠĠ, INT U SNAP INC. TAQBLU LI T-TILWIM TA' BEJNIETNA JINĠIEB U JINQATA' MINN ARBITRAĠĠ OBBLIGATORJU LI JORBOT LIT-TNEJN LI INTOM KIF IMFISSER FIT-TERMINI TAS-SERVIZZ TA' SNAP INC., U LI INT U SNAP INC. IĊĊEDU KULL JEDD LI TIEĦDU SEHEM F'XI AZZJONI KOLLETTIVA JEW F'ARBITRAĠĠ BĦALA GRUPP. GĦANDEK IL-JEDD LI TINĦELES MILL-ARBITRAĠĠ SKONT IR-REGOLI TA' DIK ID-DISPOŻIZZJONI TAL-ARBITRAĠĠ.
JEKK QED TUŻA S-SERVIZZI F'ISEM NEGOZJU U L-POST EWLIENI TAN-NEGOZJU TIEGĦEK JINSAB BARRA MILL-ISTATI UNITI TAL-AMERKA, IN-NEGOZJU TIEGĦEK SE JKUN MARBUT BID-DISPOŻIZZJONI DWAR L-ARBITRAĠĠ LI TIDHER FIT-TERMINI TAS-SERVIZZ TA' SNAP GROUP LIMITED.
Merħba! Ferħanin ħafna li interessat/a fil-Programm tal-Qligħ tal-Flus ta' Snap (il-“Programm”). Dal-Programm jagħti l-opportunità lill-utenti eliġibbli li jintlaqgħu fih biex jitħallsu talli jagħmlu ċerti servizzi li jaqgħu taħt dawn ir-Regoli tal-Qligħ tal-Flus u li aħna nirreferu għalih bħala “Għemil Eliġibbli” u li nfissru iktar tard hawn taħt. Ktibna dawn ir-Regoli tal-Qligħ tal-Flus biex tkun taf x'regoli jgħoddu għas-sehem tiegħek fil-Programm. Aqra dawn ir-Regoli tal-Qligħ tal-Flus bir-reqqa għax huma ftehim b'rabta legali bejnek u bejn l-entità ta' Snap imsemmija hawn taħt (“Snap”). L-ebda utent ma jista' jieħu sehem fil-Programm jekk ma jilqax u ma jimxix ma' dawn ir-Regoli tal-Qligħ tal-Flus.
Għall-għanijiet ta' dawn ir-Regoli tal-Qligħ tal-Flus, “Snap” tfisser:
Snap Inc. jekk tgħix ġewwa l-Istati Uniti tal-Amerka jew jekk in-negozju tiegħek ibbażat ġewwa l-Istati Uniti tal-Amerka;
Snap India Camera Private Limited jekk tgħix ġewwa l-Indja jew in-negozju tiegħek ibbażat ġewwa l-Indja;
Il-Fergħa ta' Singapore ta' Snap Group Limited jekk tgħix fir-reġjun tal-Ażja-Paċifiku (għajr l-Indja) jew in-negozju tiegħek ibbażat fir-reġjun tal-Ażja-Paċifiku (għajr l-Indja); jew
Snap Group Limited jekk tgħix jew in-negozju tiegħek ibbażat xi mkien ieħor fid-dinja.
Dawn ir-Regoli tal-Qligħ tal-Flus jinkorporaw b'referenza, ir-Regoli tas-Servizz ta' Snap, ir-Regoli tal-Komunità, il-Linji Gwida tal-Kontenut għall-Eliġibbiltà għas-Suġġerimenti, il-Linji Gwida għall-Mużika fuq Snaphat, il-Politika tal-Qligħ tal-Flus għall-Ħallieqa, il-Politika tal-Kontenut Kummerċjali, ir-Regoli tal-Offerti u r-regoli, il-linji gwida u l-politiki kollha l-oħra. Jekk dawn ir-Regoli tal-Qligħ tal-Flus imorru kontra xi termini oħra, dawn it-Termini tal-Qligħ tal-Flus huma dawk li jorbtu fejn jidħol is-sehem tiegħek fil-Programm. Il-Programm huwa parti mis-“Servizzi” ta' Snap skont it-tifsira mogħtija lill-kelma mir-Regoli tas-Servizz ta' Snap. Kull kelma miktuba b'ittra kbira li m'għandhiex tifsira f'dawn ir-Regoli tal-Qligħ tal-Flus se jkollha t-tifsira li tawha r-Regoli tas-Servizz ta' Snap jew ir-regoli li jgħoddu għas-Servizzi. Jekk kont jew kontenut jikser dawn ir-Regoli tal-Qligħ tal-Flus, mhux se jibqa' eliġibbli biex jaqla' l-flus.
Meta nagħtu t-taqsiriet f'dawn ir-Regoli tal-Qligħ tal-Flus, nagħtuhom biss bħala informazzjoni ġenerali. Għandek taqra dawn ir-Regoli tal-Qligħ tal-Flus bis-sħiħ biex tifhem il-jeddijiet u d-dmirijiet legali tiegħek.
Il-Programm miftuħ biss għall-utenti li nibagħtulhom stedina. Biex tkun eliġibbli għal stedina, għandek ikollok dawn il-ħtiġijiet bażiċi tal-eliġibbiltà (“Eliġibbiltà Bażika”):
Għandek tkun toqgħod (jekk int persuna privata) jew tkun ibbażat (jekk int entità) f'Reġjun Eliġibbli. Il-ħlas jista' jsir biss f'għadd żgħir ta' reġjuni msemmija fil-Linji Gwida għall-Premjijiet tal-Ħallieqa (ir-“Reġjuni Eliġibbli”). Nistgħu nibdlu l-lista tar-Reġjuni Eliġibbli kif jidhrilna aħna.
Jekk int persuna privata, għandek tkun maġġorenni fil-ġurisdizzjoni tiegħek (jew, jekk ikun il-każ, tkun għalaqt is-16-il sena u tkun ksibt il-permess tal-ġenituri tiegħek). Jekk il-liġi li fid-dmir li nimxu magħha titlob il-permess tal-ġenitur jew tat-tutur, ma tistax tieħu sehem fil-Programm mingħajr l-għassa tal-ġenitur(i)/tutur(i) tiegħek li għandu jaqbel ukoll li jimxu ma' dawn ir-Regoli għall-Qligħ tal-Flus. Int tistqarr u tagħti kelmtek li ksibt il-permessi kollha meħtieġa (fosthom il-kunses taż-żewġ ġenituri jekk il-liġi fil-ġurisdizzjoni tiegħek titlob hekk).
Jekk qed taħdem f'isem entità, għandek tkun għalaqt it-18-il sena (jew l-età mitluba bil-liġi biex tkun maġġorenni fl-istat, fil-provinċja jew fil-pajjiż tiegħek) u għandek ikollok is-setgħa li tidħol fi ftehim f'isem dik l-entità. Kull meta nużaw il-kelma “int” jew “tiegħek” f'dawn ir-Regoli għall-Qligħ tal-Flus, inkunu qed infissru kemm int bħala utent kif ukoll dik l-entità.
Għandek tagħti Dettalji tal-Kuntatt (imfissra hawn taħt) preċiżi u aġġornati lil Snap u lill-pjattaforma tal-ħlas barranija awtorizzata minnha (“Pjattaforma tal-Ħlas”). Ma dawn għandek tagħti l-informazzjoni l-oħra kollha li taf tkun meħtieġa biex inħallsuk. Id-“Dettalji tal-Kuntatt”, kif użata minn hawn 'il quddiem, se tfisser ismek u kunjomok uffiċjali, l-indirizz tal-email, in-numru tat-telefown, l-istat u l-pajjiż fejn toqgħod u l-informazzjoni l-oħra li taf tkun meħtieġa biex Snap jew il-Pjattaforma tal-Ħlas tagħha jkunu jistgħu jikkuntattjawk u jħallsuk (jew, skont il-każ, lill-ġenitur/lit-tutur tiegħek jew lill-entità kummerċjali tiegħek) jekk ikollhom iħallsuk jew id-dettalji mitluba b'xi liġi.
Jeħtieġlek twettaq dak kollu mitlub biex toħloq kont tal-ħlas (“Kont tal-Ħlas”) tajjeb mal-Pjattaforma tal-Ħlas tagħna.
Il-kont ta' Snapchat u l-Kont tal-Ħlas tiegħek għandhom dejjem ikunu attivi, mingħajr problemi (skont kif nifhmu aħna) u m'għandhomx jiksru dawn ir-Regoli tal-Qligħ tal-Flus.
Int (jew, skont il-każ, il-ġenitur(i)/it-tutur(i) tiegħek) għandek tgħaddi mill-proċess tal-verifika legali ta' Snap u tal-Pjattaforma tal-Ħlas.
Int la int (i) ħaddiem, uffiċjal jew direttur ta' Snap jew tal-kumpaniji sid, misjuda jew imsieħba magħha; u lanqas (ii) entità tal-gvern, kumpanija misjuda minn jew imsieħba ma' entità tal-gvern u lanqas int membru ta' familja rjali.
Għandna l-jedd li nitolbu kull informazzjoni meħtieġa biex nivverifikaw li għandek il-ħtiġijiet kollha għall-Eliġibbiltà Bażika. Anki jekk ikollok dak kollu meħtieġ, mhux bilfors se tikseb stedina jew se titħalla tkompli tieħu sehem fil-Programm. Għandna l-jedd li meta rridu u għal liema raġuni jidhrilna aħna, inneħħu lil kull utent mill-Programm.
Fi ftit kliem: Il-Programm miftuħ biss għal dawk li nibagħtulhom stedina. Għandek ikollok xi ħtiġijiet bażiċi biex tkun tista' tikseb stedina għall-Programm. Fosthom hemm l-età, il-post fejn tinsab, il-kunses tal-ġenituri u xi ħtiġijiet għall-kont tiegħek. Anki jekk ikollok dak kollu mitlub, dan ma jiggarantilekx li tikseb stedina biex tingħaqad mal-Programm. Għandek tagħtina informazzjoni tajba u preċiża u m'għandek qatt tikser dawn ir-Regoli tal-Qligħ tal-Flus.
Jekk ikollok l-Eliġibbiltà Bażika u nistednuk tingħaqad mal-Programm, Snap tista' tippremjak billi tħallsek tas-servizzi msemmija hawn (“Għemil Eliġibbli”) li tagħti. Kwalunkwe Ħlas (“Ħlas”) jista' jiġi jew minn Snap jew minn parti mid-dħul li nagħmlu mir-riklami murija b'rabta mas-Servizzi.
Fost l-Għemil Eliġibbli jaf ikun hemm:
Li ttella' Kontenut Pubbliku li nuru r-riklami fuqu; jew
Li twettaq xi għemil ieħor li nqisu bħala Għemil Eliġibbli, suġġett għall-aċċettazzjoni tiegħek għal kwalunkwe termini addizzjonali li nafu nitolbu mingħandek (li se jkunu parti minn dawn it-Termini tal-Qligħ tal-Flus).
L-Għemil Eliġibbli se jitqies minn Snap skont ma jidhrilha hi. Il-frażi “Kontenut Pubbliku” se jkollha t-tifsira mogħtija mit-Termini tas-Servizz ta' Snap. Barra minn hekk, biex il-kontenut li ttella' jkun eliġibbli għas-suġġerimenti mill-algoritmu tagħna, għandu jimxi mal-Linji Gwida għall-Kontenut għall-Eliġibbiltà għas-Suġġerimenti tagħna. Aħna nistgħu niċċekkjaw il-kont u l-kontenut tiegħek biex niżguraw li mhux jikser it-termini u l-politiki tagħna. Biex nagħmluha ċara, Snap se jkollha l-jedd imma mhux id-dmir li xxerred il-kontenut li ttella' fuq Snapchat skont it-Termini tas-Servizz ta' Snap. Tista' tħassar l-iSnaps tiegħek meta trid.
Fi ftit kliem: Nistgħu nippremjawk billi nħallsuk talli twettaq xi għemil. Il-jeddijiet li tagħtina u d-dmirijiet tiegħek fejn jidħol il-Kontenut Pubbliku li ttella' jinsabu fit-Termini tas-Servizz u fil-Linji Gwida tal-Kontenut għall-Eliġibbiltà għas-Suġġerimenti tagħna. L-għemejjel, il-kont u l-kontenut li ttella' għandhom dejjem jimxu mat-termini, mal-politiki u mal-linji gwida tagħna. Nistgħu niċċekkjaw il-kont u l-kontenut tiegħek biex nifhmu jekk humiex jimxu magħhom. M'għandna l-ebda dmir inxerrdu l-kontenut li ttella' fuq Snapchat u nistgħu nħassru dak il-kontenut tiegħek meta rridu
Is-somom tal-ħlas (“Ħlas”) għall-Għemil li Jikkwalifika se jinħadmu minna skont il-formola tal-ħlas tagħna. Minn żmien għal żmien, nistgħu nibdlu l-formola tal-ħlas tagħna u dil-formola tista' tqis kemm ittella' l-kontenut ta' sikwit u meta ttellgħu, l-għadd ta' riklami li jixxandru fil-kontenut li ttella', jekk il-kontenut tiegħek jużax l-Għodda tal-Kreattività ta' Snapchat, u r-reazzjonijiet tal-utenti għal dak il-kontenut. Kull somom tal-ħlas murija fl-app ta' Snapchat huma biss stimi li nuruk biex nagħtuk idea u jistgħu jinbidlu. Mhux se tkun eliġibbli biex inħallsuk dak il-Ħlas stmat jekk tkun qed tikser dawn it-Termini tal-Qligħ tal-Flus u ma tkunx ħejjejt Kont tal-Ħlas tajjeb mal-Pjattaforma tal-Ħlas tagħna. Is-somom aħħarin tal-ħlas se jintwerew fil-Kont tal-Ħlas tiegħek.
Kif Titlob Pagament. Malli jkollok biżżejjed Għemil li Jikkwalifika biex tkun tista' titlob l-inqas somma għall-ħlas ta' $100 USD, tista' tressaq talba għall-ħlas billi tagħżel l-għażla apposta mill-profil tal-utent tiegħek. Sakemm il-liġi tħallina nagħmlu hekk u sakemm timxi ma' dawn ir-Regoli tal-Qligħ tal-Flus, se nibagħtulek il-ħlas fuq il-Kont tal-Ħlas tiegħek mill-Pjattaforma tal-Ħlas tagħna.
JEKK JOGĦĠBOK ŻOMM F'MOĦĦOK: JEKK (A) MA TKUNX WETTAQT XI GĦEMIL LI JIKKWALIFIKA GĦAL SENA JEW (B) MA TKUNX TLABT ĦLAS KIF SUPPOST SKONT IL-PARAGRAFU TA' QABEL GĦAL SENTEJN, MALLI JGĦADDI Ż-ŻMIEN IMSEMMI, JEKK MA TKUNX KSIRT DAWN IR-REGOLI TAL-QLIGĦ TAL-FLUS, SE NIBAGĦTULEK IL-FLUS FIL-KONT TAL-ĦLAS TIEGĦEK SKONT L-GĦEMIL LI JIKKWALIFIKA LI NKUNU QISNIELEK SA TMIEM DAK IŻ-ŻMIEN. JEKK MALLI JGĦADDI DAK IŻ-ŻMIEN TKUN KSIRT XI ĦTIEĠA MSEMMIJA F'DAWN IR-REGOLI TAL-QLIGĦ TAL-FLUS, MA TKUNX ELIĠIBBLI BIEX INĦALLSUK IL-FLUS MARBUTA MAL-GĦEMIL LI JIKKWALIFIKA.
Skont dawn ir-Regoli tal-Qligħ tal-Flus, il-Pjattaformi tal-Ħlas tagħna jistgħu jħallsuk f'isem Snap, il-kumpaniji tagħha jew l-entitajiet imsieħba magħha li jistgħu jkunu huma li jħallsu. Snap ma tistax tinżamm responsabbli għal xi dewmien, nuqqas jew nuqqas ta' setgħa li tibgħatlek il-Ħlas fil-Kont tal-Ħlas tiegħek għal xi raġuni li mhix fil-kontroll ta' Snap, fosthom li int ma timxix ma' dawn ir-Regoli tal-Qligħ tal-Flus. Snap ma tistax tinżamm responsabbli jekk xi ħadd għajrek jitlob il-Ħlas bil-kont ta' Snapchat tiegħek jew jibgħat il-Ħlas tiegħek bid-dettalji tal-Kont tal-Ħlas tiegħek. Għalkemm il-Ħlas se jintbagħat f'dollari tal-Istati Uniti tal-Amerka, tista' tagħżel li tiġbed il-flus mill-Kont tal-Ħlas tiegħek fil-munita tal-post tiegħek wara li tħallas it-tariffi tal-kambju u tat-tranżazzjonijiet kif imsemmi fil-Linji Gwida tal-Premjijiet tal-Ħallieqa u skont ir-regoli tal-Pjattaformi tal-Ħlas tagħna. Snap ma tistax tinżamm responsabbli għall-flus mhux miġbuda mill-Kont tal-Ħlas tiegħek. M'għandek l-ebda jedd għal dawk il-flus sakemm nibagħtuhomlok skont dawn ir-Regoli tal-Qligħ tal-Flus.
Minbarra l-jeddijiet u l-kumpensi l-oħra tagħna, sakemm il-liġi tħallina nagħmlu hekk nistgħu, mingħajr ma ngħarrfuk jew inwiddbuk minn qabel, inżommulek, nibbilanċjaw, nibdlulek jew inneħħulek xi Ħlas skont dawn ir-Regoli tal-Qligħ tal-Flus b'rabta ma' għemil li nemmnu li huwa Għemil Mhux Tajjeb (skont it-tifsira mogħtija hawn taħt), talli ma timxix ma' dawn ir-Regoli tal-Qligħ tal-Flus, talli nkunu bgħatnielek xi flus żejda bi żball jew biex nagħmlu tajjeb għat-tariffi li tafna b'rabta ma' xi ftehim ieħor.
Fi ftit kliem: Jeħtieġlek tilħaq il-$100 USD qabel tkun tista' titlob il-Ħlas. Meta tilħaq is-somma meħtieġa, tista' titlobna nibagħtulek il-ħlas. Jekk wara li jgħaddi ċertu żmien ma titlobniex il-ħlas, aħna nippruvaw inħallsuk minn rajna jekk ma tkunx ksirt dawn ir-Regoli tal-Qligħ tal-Flus. Jekk tkun ksirt dawn it-termini, mhux se tkun eliġibbli biex nibagħtulek Ħlas għal xi Għemil li Jikkwalifika. Ma tistax iżżomna responsabbli għal xi problemi bil-ħlas li jinbtu barra mill-kontroll tagħna jew għal xi fondi mhux miġbuda fil-Kont tal-Ħlas tiegħek. Nistgħu nżommu jew nibbilanċjaw il-Ħlas li nafuk jekk tikser dawn ir-Regoli tal-Qligħ tal-Flus jew xi ftehim ieħor li għandek magħna.
Int taqbel u tifhem li int biss responsabbli għat-taxxi, għad-dazji jew għat-tariffi marbuta mal-Ħlas li tikseb skont dawn it-Termini tal-Qligħ tal-Flus. Il-Ħlas diġà fih it-taxxi fuq il-bejgħ, l-użu, is-sisa, il-valur miżjud, it-taxxi fuq il-prodotti u s-servizzi u t-taxxi l-oħra kollha li għandna nagħtuk. Jekk, skont il-liġi fis-seħħ, għandna d-dmir li nnaqqsu jew inżommu t-taxxi minn xi Pagamenti li nafuk, Snap, l-imsieħba tagħha jew il-Pjattaforma tal-Ħlas se jnaqqsu dawk it-taxxi mis-somma li jafuk u jħallsu dawk it-taxxi lill-awtorità tat-taxxa t-tajba kif mitlub mil-liġi. Int taqbel u tifhem li l-Ħlas għalik b'dawn iż-żammiet u t-tnaqqis huwa l-ħlas a saldu li nafuk skont dawn it-Termini tal-Qligħ tal-Flus. Biex tħejji Kont tal-Ħlas validu, għandek tagħti lil Snap, lill-kumpaniji tagħha, lill-imsieħba tagħha u lill-Pjattaformi tal-Ħlas il-formoli jew id-dokumenti li jafu jkunu meħtieġa biex ikunu jistgħu jaqdu d-dmirijiet tad-denunzju jew taż-żamma tat-taxxa skont dawn it-Termini tal-Qligħ tal-Flus.
Fi ftit kliem: Int responsabbli għat-taxxi, id-dazji u t-tariffi kollha marbuta mal-Ħlas tiegħek. Nistgħu nnaqqsu s-somom skont ma titlob minna l-liġi. Inti dejjem se tagħtina l-formoli jew id-dokumenti meħtieġa għal dawn l-għanijiet.
Kif semmejna fit-Termini tas-Servizz ta' Snap, is-Servizzi jaf ikun fihom xi riklami. B'rabta mas-sehem tiegħek fil-Programm, taqbel li qed tqabbad lilna, lill-imsieħba tagħna u lill-imsieħba tal-parti terza biex juru r-riklami b'rabta mal-Kontenut Pubbliku li ttella' kif jidhrilna aħna biss. Taqbel li tgħinna nuru dawn ir-riklami billi taqbel u timxi ma' dawn it-Termini tal-Qligħ tal-Flus u tkompli tagħti lil Snap aċċess għall-Kontenut Pubbliku li ttella' bħala parti mis-sehem tiegħek fil-Programm skont dawn it-Termini tal-Qligħ tal-Flus. Jekk nagħżlu li nuru r-riklami, se nkunu aħna li nagħżlu x-xorta ta' riklami murija fuq is-Servizzi fosthom ix-xorta, l-għamla u r-rata tar-riklami murija b'rabta mal-Kontenut Pubbliku li ttella' għas-sehem tiegħek fil-Programm. Għandna wkoll il-jedd li, skont ma jidhrilna aħna, ma nurux riklami fuq, fil- jew qrib il-Kontenut Pubbliku li ttella'. Jekk toqgħod barra mill-Istati Uniti tal-Amerka int (u l-kollaboraturi, il-kontributuri u l-amministraturi li jtellgħu l-kontenut mill-kontenut tiegħek) għandhom ikunu jinsabu barra mill-Istati Uniti tal-Amerka u f'Reġjun Eliġibbli meta jagħmlu xi servizzi u meta jgħinu bil-wiri tar-riklami b'rabta mal-Għemil Eliġibbli tiegħek.
Fi ftit kliem: Qed titlobna nuru r-riklami fil-kontenut li ttella' fuq Snapchat għas-sehem tiegħek fil-Programm. Aħna nagħżlu r-riklami li jintwerew jew ma jintwerewx b'rabta mal-kontenut. Jekk tgħix barra mill-Istati Uniti tal-Amerka, il-post fejn tinsab jgħodd meta tiġi biex tagħmel l-Għemil Eliġibbli.
Biex ma jkun hemm l-ebda dubju, fejn jidħlu l-ilmenti, it-tariffi, it-talbiet, id-danni, it-telf, in-nefqiet, id-djun u l-ispejjeż kollha (fosthom it-tariffi tal-avukati) (“Talbiet”) marbuta mal-kontenut li ttella' fuq Snapchat (skont it-tifsira mogħtija fit-Termini tas-Servizz ta' Snap), int taqbel li, safejn il-liġi tħallik tagħmel hekk, tindennizza, tħares u teħles mir-responsabbiltà lil Snap, lill-imsieħba tagħna, lid-diretturi, lill-uffiċjali, lill-azzjonisti, lill-ħaddiema, lil-liċenzjaturi u lill-aġenti tagħna minn u kontra kull Talba minħabba, li tinbet minn jew marbuta ma' xi Talba li ma ħallastx xi somom li kellek jew għandek tħallas lil xi union, għaqda (fosthom ir-royalties, it-tariffi mtennija u t-tariffi għall-użu mill-ġdid), operatur, artist, kompożitur (fosthom it-tariffi tal-liċenzja tas-sinkronizzazzjoni), għaqda tal-ispettakli pubbliki u għaqdiet tal-jeddijiet tal-ispettakli (bħal ASCAP, BMI, SACEM u SESAC), atturi, ħaddiema, kuntratturi indipendenti, fornituri tas-servizz jew xi detentur tal-jeddijiet ieħor b'rabta mal-kontenut li tuża u ttella' fuq is-Servizzi.
Fi ftit kliem: Int responsabbli li tagħmel kwalunkwe ħlas li taf lil ħaddieħor b'rabta mal-kontenut li ttella'. Jekk ma tagħmilx hekk u nġarrbu xi telf, taqbel li tagħmlilna tajjeb għalih.
Meta nifhmu jekk xi għemil hux Għemil Eliġibbli jew is-somma ta' kwalunkwe Ħlas, nistgħu ma nqisux xi għemil li jżid l-għadd tal-wiri tal-kontenut li ttella' (jew xi kejl ieħor tal-wiri jew tar-reazzjonijiet) b'mod artifiċjali (“Għemil Mhux Validu”). L-Għemil Mhux Validu jiddependi mill-fehma ta' Snap, skont kif jidhrilha hi, u jiġbor fih l-ispam, it-talbiet, it-tweġibiet, il-likes, il-favoriti, is-segwaċi, l-abbonamenti, l-impressions, jew kull kejl ieħor tal-interazzjonijiet:
maħluqa minn xi bniedem, sistema tal-klikks jew servizz ieħor bħalu, bot, programm awtomatiku jew tagħmir bħalu fosthom kull klikk, impressions jew għemil ieħor ġej mill-mowbajl tiegħek, mowbajls fil-kontroll tiegħek jew mowbajls b'kontijiet ġodda jew suspettużi;
miksuba bi ħlas bil-flus jew b'xi premjijiet oħra lil parti terzi, bil-qerq jew bħala tpartit tal-ftuħ tal-kontenut;
maħluqa b'għemil li b'xi mod jikser dawn it-Termini tal-Qligħ tal-Flus; u
mħallta ma' xi wieħed mill-għemejjel imsemmija hawn fuq.
Fi ftit kliem: Mhux se nħallsuk jekk tkabbar il-kejl tal-ftuħ jew xi kejl ieħor tal-kontenut tiegħek b'mod artifiċjali.
Biex tkompli s-sehem tiegħek fil-Programm, għandek dejjem timxi ma' dawn it-Termini tal-Qligħ tal-Flus. Jekk mhux timxi ma' dawn it-Termini tal-Qligħ tal-Flus, mhux se tkun tista' tkompli tieħu sehem fil-Programm u se jkollna l-jedd li nissospendulek jew inneħħulek għalkollox l-aċċess għas-Servizzi tagħha u se nkunu nistgħu nagħmlu kull azzjoni oħra li jidhrilna li tkun xierqa. Jekk tikser dar-Regoli, jekk il-liġi tħallina nagħmlu hekk, għandna l-jedd li nżommu (u int taqbel li m'għandek l-ebda jedd tikseb) il-ħlas marbuta ma' dawn it-Termini tal-Qligħ tal-Flus. Jekk fi kwalunkwe ħin ma taqbilx ma' xi biċċa minn dawn it-Termini tal-Qligħ tal-Flus, trid tieqaf tuża s-Servizzi li jaqgħu taħthom.
Sa fejn nistgħu nagħmlu hekk skont il-liġi, għandna l-jedd li nwaqqfu, nibdlu, ma nkomplux jew intemmu l-Programm jew is-Servizzi fi kwalunkwe ħin u għal kwalunkwe raġuni, minn rajna, mingħajr ma ngħarrfuk minn qabel u mingħajr ma nkunu nafuk xejn. Ma nagħtuk l-ebda garanzija li dawn li ġejjin se jkunu disponibbli l-ħin kollu jew f'xi ħin partikolari jew li se nkomplu nagħtu dawn li ġejjin għal xi tul ta' żmien partikolari. M'għandekx tistenna li l-Programm jew xi Servizz ieħor minn tagħna se jibqa' fis-seħħ għal dejjem.
Fi ftit kliem: Nistgħu nillimitawlek jew intemmulek is-sehem tiegħek fil-Programm jew nibdlu, nissospendu jew intemmu l-Programm fi kwalunkwe ħin u għal kwalunkwe raġuni.
Int u Snap (għall-għanijiet ta' dit-taqsima msejħa bħala n-“Naħat”) taqblu li timxu ma', u titolbu lil kull min jagħmel xi għemil f'isem in-Naħat li jimxi mal-liġijiet, ir-regoli u r-regolamenti ta' kontra l-korruzzjoni kollha li fid-dmir li jimxu magħhom. Dan ifisser li, fost l-oħrajn: in-Naħat u kull min qed iwettaq xi għemil f'isimhom mhux se jagħtu, jwiegħdu li jagħtu, joffru, jaqblu li jagħtu jew jaqblu mal-għoti dirett jew indirett ta' flus jew ħwejjeġ ta' valur oħra lil xi ħadd biex jiksbu jew jippremjawh ta' għemil mixtieq, bħala kundizzjoni għal xi għemil jew biex jiksbu li jixtiequ. Jgħidu xi jgħidu d-dispożizzjonijiet l-oħra ta' dawn ir-Regoli tal-Qligħ tal-Flus, il-parti li ma tkunx kisret ir-regoli tista' tinħall minn dawn ir-Regoli tal-Qligħ tal-Flus wara li tgħarraf lin-naħa l-oħra jekk in-naħa l-oħra tkun kisret did-dispożizzjoni.
In-Naħat jaqblu li l-ħidma tagħhom skont dawn ir-Regoli tal-Qligħ tal-Flus tkun skont is-sanzjonijiet, il-liġijiet tal-kontroll tal-esportazzjoni u l-liġijiet ta' kontra l-bojkots kollha li fid-dmir li jimxu magħhom. In-Naħat jistqarru u jwiegħdu li (1) l-ebda naħa (jew sid, kumpanija misjuda jew kumpanija msieħba li tagħti sehemha fit-twettiq ta' dawn ir-Regoli tal-Qligħ tal-Flus) ma tissemma f'xi lista ta' parti limitata miżmuma minn xi awtorità tal-gvern, bħal, ngħidu aħna, l-iSpecially Designated Nationals List tal-Istati Uniti tal-Amerka u l-Foreign Sanctions Evaders List tal-Uffiċju tal-Kontroll tal-Assi Barranin tad-Dipartiment tat-Teżor tal-Istati Uniti tal-Amerka u d-Denied Parties List, l-Unverified List u l-Entity List miżmuma mill-Uffiċċju tal-Industrija u s-Sigurtà tal-Istati Uniti tal-Amerka (“Listi tan-Naħat Limitati”) u li (2) dik in-naħa mhix misjuda jew ikkontrollata minn xi ħadd fuq Lista ta' Naħa Limitata. Hi u twettaq dawn ir-Regoli tal-Qligħ tal-Flus, l-ebda naħa m'għandha taħdem ma' jew tagħti l-prodotti jew is-servizzi, direttament jew indirettament, lil xi ħadd fuq xi Listi tan-Naħat Limitati jew xi pajjiż li għandu xi sanzjonijiet kummerċjali kontrieh. Int taqbel li Snap mhux se tkun fid-dmir li tagħmel xi ħaġa jew ma tagħmilx xi ħaġa b'rabta ma' dawn ir-Regoli tal-Qligħ tal-Flus jekk xi għemil jew nuqqas ta' għemil ikun se jwassal għall-ksur tal-liġijiet ta' xi ġurisdizzjoni li għandna nimxu magħhom.
Mhux se tkun eliġibbli għal Ħlas jekk int (jew, skont il-każ, il-ġenitur(i)/it-tutur(i) jew l-entità kummerċjali tiegħek) ma tgħaddux minn spezzjoni legali tagħna jew tal-Pjattaforma tal-Ħlas tagħna. Fost ħwejjeġ oħra, matul l-ispezzjoni nafu niċċekkjaw jekk tissemmiex fuq xi Lista ta' Naħa Limitata miżmuma mill-awtoritajiet tal-gvern. Minbarra l-użu li se nagħmlu mill-informazzjoni li tagħti skont dawn ir-Regoli tal-Qligħ tal-Flus, nistgħu naqsmu l-informazzjoni ma' entitajiet oħra biex nivverifikaw l-identità tiegħek, inwettqu l-ispezzjonijiet legali tagħna u nwettqu l-proċess tal-ħlas.
Fi ftit kliem: Kemm int kif ukoll Snap se timxu mal-liġijiet ta' kontra l-korruzzjoni, mas-sanzjonijiet ekonomiċi, mal-liġijiet tal-kontroll tal-esportazzjoni u mal-liġijiet ta' kontra l-bojkots kollha msemmija hawn fuq li fid-dmir li timxu magħhom. Biex tkun tista' titħallas, jeħtieġlek tgħaddi minn spezzjoni legali
Jekk tagħti lil utenti oħra tas-Servizz aċċess biex itellgħu l-kontenut fuq il-kont tal-utent ta' Snapchat tiegħek jew toħloq u tieħu ħsieb kontijiet sekondarji mill-kont tal-utent ta' Snapchat tiegħek, tkun qed tifhem u taqbel li r-responsabbiltà għall-għoti u t-tneħħija tal-permessi marbuta mal-kont tiegħek hija tiegħek biss. Int responsabbli għall-kontenut u l-għemil kollu marbut mal-kont tiegħek, fosthom l-għemejjel tal-amministraturi, tal-kollaboraturi u tal-kontributuri. Kull tant żmien nafu nibdlu dawn ir-Regoli tal-Qligħ tal-Flus. Jekk dawk il-bidliet f'dawn ir-Regoli tal-Qligħ tal-Flus ikunu kbar, (sakemm dawn il-bidliet ma jkunux meħtieġa aktar kmieni, minħabba, ngħidu aħna, xi bidla fil-liġi jew għax inkunu se nniedu Servizzi jew faċilitajiet ġodda), se ngħarrfuk bil-bidliet b'biżżejjed żmien bil-quddiem. Jekk wara l-bidliet tkompli tieħu sehem fil-Programm, se nqisu li qbilt magħhom. Jekk ma taqbilx mal-bidliet f'dawn ir-Regoli tal-Qligħ tal-Flus, għandek ittemm is-sehem tiegħek fil-Programm billi titfi l-għażla mill-Profil tiegħek. Dawn ir-Regoli tal-Qligħ tal-Flus ma joħolqux u ma jagħtukx jeddijiet bħala benefiċjarju barrani. L-ebda ħaġa f'dawn ir-Regoli tal-Qligħ tal-Flus m'għandha tinftiehem li qed tinħoloq sħubija kummerċjali, regolazzjoni ta' aġenzija jew għoti ta' xogħol bejnek u bejn Snap jew l-imsieħba ta' Snap. Jekk ma nwettqux xi dispożizzjoni ta' dawn ir-Regoli tal-Qligħ tal-Flus, m'għandhiex tinftiehem li ċedejnieha. Għandna l-jeddijiet kollha li ma tajniekx direttament. Jekk xi traduzzjoni ta' dawn ir-Regoli tal-Qligħ tal-Flus tmur kontra l-verżjoni bl-Ingliż, il-verżjoni bl-Ingliż għandha tkun dik li torbot. Jekk xi dispożizzjoni ta' dawn ir-Regoli tal-Qligħ tal-Flus tinstab li ma tistax titwettaq, dik id-dispożizzjoni se titneħħa minn dawn ir-Regoli tal-Qligħ tal-Flus u mhux se tolqot is-setgħa li jitwettqu d-dispożizzjonijiet l-oħra. It-taqsimiet 6, 9 u 10 ta' dawn ir-Regoli tal-Qligħ tal-Flus u d-dispożizzjonijiet li minnhom infushom maħsuba biex jibqgħu fis-seħħ wara li l-partijiet jinħallu mill-ftehim għandhom jibqgħu fis-seħħ wara t-tmiem jew il-ħall minn dawn ir-Regoli tal-Qligħ tal-Flus.
Fi ftit kliem: Għandek ir-responsabbiltà sħiħa għall-għemejjel kollha li jitwettqu bil-kont tiegħek. Għandek taqra dawn ir-Regolital-Qligħ tal-Flus għax nistgħu nibdluhom. Dawn ir-Regoli tal-Qligħ tal-Flus ma joħolqu l-ebda ftehim tax-xogħol bejnietna. Il-verżjoni bl-Ingliż ta' dawn ir-Regoli tal-Qligħ tal-Flus hija dik li torbot u xi dispożizzjonijiet jibqgħu fis-seħħ anki wara it-tmiem jew il-ħall ta' dawn ir-Regoli tal-Qligħ tal-Flus.
Jekk għandek xi mistoqsija dwar dawn it-Termini tal-Qligħ tal-flus, kemm tikkuntattjana.